विद्यार्थीदशेत अभ्यास हा करावाच लागतो. त्यावरच पुढील आयुष्याची गणिते ठरत असतात. पण हे कळण्याचे वय नसल्याने अभ्यासाचा कंटाळा, कटकट वाटत असते. असे वाटू नये म्हणून अभ्यास कसा करावा, 'अभ्यास' कौशल्यांची गरज व ती कोणती आहेत. काळाचे भान ठेवून केलेला अभ्यास, त्यातून मिळणारे यश या सर्व गोष्टींची चर्चा प्रा. डॉ. विश्वनाथ शिंदे यांनी अभ्यास कौशल्ये एक पाउल पुढे.... या पुस्तकात केली आहे.
प्रथम अभ्यास कौशल्ये का व कशासाठी हे उदाहरणे देऊन सांगितले आहे. अभ्यास कौशल्य प्रशिक्षण कसे घ्यावे, त्यातून मिळालेला बोध व शोध, अध्ययन व अभ्यास कौशल्यांची वर्गवारी, अभ्यास पद्धत (SQ3R),वेळापत्रक नियोजनाचे महत्व, एकाग्रस्ता कौशल्य, वाचन कौशल्य, कल्पनांचे संघटन, टिपण कौशल्य, स्मरण कौशल्य आत्मसात कशी करावी याचे मार्गदर्शन केले आहे.
पाचवी सहावीपासून महाविद्यालयीन विद्यार्थी अध्ययनासाठी उत्सुक इतर सर्वांसाठी कमी खर्चात, कमी प्रयत्नात जास्त ज्ञान कसे मिळवता येईल यासाठी ही माहिती उपयुक्त ठरेल.
